قازۇۋ-دا قىتايدىڭ ۋنيۆەرسيتەتىمەن عارىشقا ميكروسپۋتنيك ۇشىرىپ, سۋپەركومپيۋتەر ورناتۋ كەلىسىمىنە قول قويىلدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ پەن قازاقستانعا رەسمي ساپارمەن كەلگەن قحر توراعاسى سي ءتسزينپيننىڭ كەزدەسۋىندە ءال-فارابي اتىنداعى قازاق ۇلتتىق ۋنيۆەرسيتەتى مەن قىتاي حالىق رەسپۋبليكاسىنىڭ سولتۇستىك-باتىس پوليتەحنيكالىق ۋنيۆەرسيتەتى ميكروسپۋتنيك ارقىلى عىلىمي-زەرتتەۋلەر جۇرگىزىپ, ۇلتتىق ۋنيۆەرسيتەتتە سۋپەركومپيۋتەر ورناتۋ تۋرالى كەلىسىمگە قول قويدى.
قازاقستان عالىمدارىنا دەرەكتەردىڭ ۇلكەن كولەمىمەن جۇمىس ىستەۋگە, مەملەكەتتىك ورگاندار جۇمىسىن مودەلدەۋگە جانە ەلىمىزدىڭ IT ينفراقۇرىلىمىن دامىتۋدا مول مۇمكىندىك تۋعىزادى دەپ بولجانىپ وتىرعان سۋپەركومپيۋتەر جاساندى ينتەللەكت تەحنولوگيالارىن, ۋنيۆەرسيتەت قىزمەتىنىڭ نەگىزگى باعىتتارى بويىنشا عىلىمدى قاجەتسىنەتىن ەسەپتەۋلەردى جاساۋدى قامتاماسىز ەتەدى. مۇنىمەن قوسا IoT-وبەكتىلەردى باسقارۋ جانە ۇيىمداستىرۋ, Smart-تەحنولوگيالار وبەكتىلەرىن باسقارۋ جونىندەگى باعدارلامالىق قامتاماسىز ەتۋدى ازىرلەۋ ءۇشىن پايدالانىلادى. ورتالىق ازياداعى ەڭ قۋاتتى سۋپەركومپيۋتەردىڭ جوعارى ونىمدىلىگى 1,94 PFLOPS.
ۇلتتىق ۋنيۆەرسيتەتپەن ميكروسپۋتنيك ۇشىرۋدى جوسپارلاپ وتىرعان قىتايدىڭ سولتۇستىك-باتىس پوليتەحنيكالىق ۋنيۆەرسيتەتى عارىش نانوسپۋتنيكتەرى بويىنشا كوشباسشى سانالادى.
بىرلەسكەن جوبا اياسىندا جەر قىرتىسى مەن مانتياداعى تىعىزدىق گەتەروگەندىلىگىن انىقتاۋ ءۇشىن سپۋتنيكتىڭ ارنايى جەر ستانتسياسى مەن تاراتقىشتى قامتيتىن گراۆيمەتريالىق ولشەۋ جابدىقتارىن ازىرلەۋگە باعىتتالىپ وتىر. بۇل جۇمىس ۇلكەن تەرەڭدىكتەگى گەوديناميكالىق ۇردىستەردى زەرتتەۋدىڭ نەگىزگى مىندەتتەرىن شەشۋدى كوزدەيدى. تاراپتاردىڭ پىكىرىنشە, بىرلەسكەن جوبا عارىشتى زەرتتەۋگە, بىلىكتى مامانداردى دايارلاۋعا جانە ورتاق سپۋتنيكتەردى ازىرلەۋگە جول اشادى. سونىمەن قاتار ميكروسپۋتنيك ارقىلى جەردى قاشىقتىقتان زەرتتەۋ جۇمىستارىن جۇرگىزۋگە مول مۇمكىندىك بەرەدى.
ەكى ەل ۋنيۆەرسيتەتتەرى عالىمدارى بىرلەسىپ جاساعان ميكروسپۋتنيكتى عارىشقا ۇشىرۋ شانحاي ىنتىماقتاستىق ۇيىمى جاريالاعان ەكولوگيا جىلى اياسىندا جانە قارا شاڭىراق قازۇۋ-دىڭ 90 جىلدىعى قارساڭىندا جوسپارلانىپ وتىر.
بۇگىندە ءال-فارابي اتىنداعى قازۇۋ عارىشقا نانوسپۋتنيكتەردى ۇشىرۋ بويىنشا تاجىريبەسى بار ەلىمىزدەگى جالعىز جوعارى وقۋ ورنى. بۇگىنگە دەيىن وقۋ ورداسى عارىش ايلاعىنا «Al-Farabi-1» جانە «Al-Farabi-2» نانوسپۋتنيگىن ۇشىرعان ەدى.